يا أهلاً وسهلاً، إذا زرتنا هنا، فاتوقع إنك من محبّي القراءة، الكتب، وإحساس لما تخلص كتاب نفسك ما يخلص..
أو بس عندك فضول ليش عندي Blog ومكبرة الموضوع.. برضو أهلاً وسهلاً..
تعرف إحساس لما تقرأ كتاب، ويطلع أسوأ قرار اتخذتو؟ يطفّش/ صعب بزيادة/ مو جوّك/... ممكن حتى ما تقدر تكمّلو. بالزبط، حتى أنا أكره دا الإحساس. تحاول تدوّر على reviews عالكتاب قبل ما تشتريه، بس فيه تفاصيل كثير تبغى تعرفها، محد يقولك عنها، زي أسلوب الكاتب، ولا صعوبة اللغة. عشان كدا قررت أسوي هادي السلسلة: أكتب review صادق، حقيقي لكتاب قرأتو. نبدأ؟
Atomic Habits: James Clear
إيش سالفة الكتاب؟
ليش صعب علينا نلتزم بعادة؟ ليش نتحمس في البداية بعدين نخف ونخف وبدون ما ننتبه: نوقف؟ الكتاب يجاوب على كل دي الأسئلة. بس ما يسيبك هنا، يبدأ بعدها يقولك ال"كيف"، يتكلم عن كيف تكوّن عادة. منجد تكوّنها، تلتزم بيها، كل يوم (كيف أصحى بدري كل يوم، اقرأ كل يوم، أقول ذكري كل يوم، ...) أي عادة في بالك. كيف تخليها جزء لا يتجزأ من يومك، كيف تخليها سهلة، كيف تخليها مستدامة.
مناسب لك لو...
فيه شي تبغى/تحتاج تسويه كل يوم، بس محتار كيف تلتزم بيه. حاس بصعوبة في الالتزام، تحس إنك too lazy ما عندك شغف، حماس كفاية، ...
دقيقة، مو قادرة استنى، حقولك سر (عرفتو من الكتاب).. منك كسول، منك قليل الحماس (unmotivated)، مافي شي غلط فيك. كل اللي تحتاجو هوا: الطريقة. تجاربك السابقة مع العادات ما فشلت بسبب شي فيك، في الغالب بس كنت تحتاج تسويها بالطريقة الصح، الصح لك، والكتاب يتكلّم عن دا الموضوع بالضبط: إيش الطريقة الصح اللي تخلي عاداتنا تثبت معانا؟
إيش المميز في الكتاب؟
المميز إنو يدرس كيف الإنسان يتصرف بطبيعته، إيش اللي يخلينا نتحرك، ليش العادات السيئة أسهل علينا نستمر فيها بس العادات اللي فعلاً نبغاها صعب نلتزم بيها. قد إيش شعورنا هوا اللي يدفعنا أكثر من إيش "منطقي"و"مفيد لنا"و كيف نستخدم هادي المعلومة لصالحنا، في تكوين العادة. هذا فعلاً اللي يتميز فيه الكتاب، يستخدم طريقة تتوافق مع طبيعتنا البشرية، ما يعاكسها، وهذا اللي يخلي العادات تمسك معانا.
لغة/ أسلوب الكتاب
وصلنا للحقيقة.. هل تشتري الكتاب؟ حتى لو كان شغفك الأبدي تكوين العادات، السؤال المهم، هل أسلوب الكتابة تناسبك؟ تعجبك؟
الكتاب باللغة الإنجليزية، ومستوى الصعوبة: ٦/١٠، كمية المصطلحات العلمية ٤/١٠ وهادي النقطة الفارقة. الكاتب يحب يقنعك في البداية بإنو يعرضلك دراسة علمية/ قصة تاريخية، بعدين يقولك المعلومة، وكيف تطبّقها في حياتك.
شي ثاني، الفصل الواحد تقريبًا ١١ صفحة، فما تجلس كثير/تطفش في الموضوع الواحد، يخلص بسرعة. والحلو إنه بعد كل فصل: يعطيك تلخيص لأهم المعلومات، على شكل نقاط رئيسية: ٥ أو ٦ نقاط، كل نقطة عبارة عن جملة وحدة بسيطة، يخلي المعلومة تثبت عندك فعلاً.
وإيوة حسبتها بنفسي ١١.٩ آلة حاسبة وحركات 😏 (اختصرتها ل١١ مو ١٢ لأنو آخر صفحة فيها الملخص ) 
محى يعجبك لو...
ما تحب الكلام العلمي، شرح لدراسة علمية، حتى لو كانت مختصرة، حتى لو مشروحة بطريقة مفهومة للناس عامة. أو يطفّشك أسلوب تكرار المعلومة، لأنو ماشاءالله ما يقصّر يثبّتلك المعلومة غصب 😂
بس لو ما تحب أي أسلوب من اللي قبل، فغالبًا الكتاب ما يناسبك
لو اتحمست على موضوع الكتاب، بس الأسلوب/اللغة ما تناسبك: اكتبلي comment أو أرسلي عالإيميل، ممكن أسوي ملخص لو كثير منكم يبغى 😉 الكتاب بس بدون الأسلوب اللي ما ناسبكم 👌🏼ها إيش رايكم؟
عجبتكم فكرة السلسلة؟ فيه تساؤلات ما اتطرقتلها؟ أسئلة ما جاوبتها؟ قولولي comment، أو فضفضولي عالإيميل، متحمسة أعرف كل آراءكم..
نلقاكم قريبًا ❤️
コメント